धरानस्थित पुरानो अस्पतालको जग्गा फिर्ता गरी 'नगर अस्पताल' बनाउन धरान उपमहानगरको माग

धरान । धरान उपमहानगरपालिकाले नगरभित्र सुविधासम्पन्न 'नगर अस्पताल' स्थापनाका लागि पहल सुरु गरेको छ । 

उपमहानगरपालिकाले प्रधानमन्त्री तथा मन्त्रिपरिषद्को कार्यालयलाई पत्राचार गर्दै बी.पी. कोइराला स्वास्थ्य विज्ञान प्रतिष्ठानको नाममा रहेको पुरानो धरान अस्पतालको जग्गा पुनः प्राप्तिका लागि अनुरोध गरेको हो ।

के छ पत्रमा ?
कार्यवाहक नगर प्रमुख आईन्द्र विक्रम बेघाद्वारा हस्ताक्षरित पत्रमा धरानका नागरिकलाई आधारभूत र गुणस्तरीय स्वास्थ्य सेवा सहज रूपमा उपलब्ध गराउन नगर अस्पतालको खाँचो रहेको उल्लेख छ । हालसम्म धरानमा आफ्नै नगर अस्पताल नहुँदा स्वास्थ्य बीमा कार्यक्रम र अन्य प्राथमिक सेवाहरू सञ्चालनमा समस्या परिरहेको व्यहोरा पत्रमा जनाइएको छ ।

जग्गाको विवाद र इतिहास

पत्रमा उल्लेख भएअनुसार, धरान–१ मा रहेको साविकको धरान अस्पतालको जग्गा २०७४ सालअघि सोही अस्पतालकै नाममा थियो। तर, विभिन्न समयमा भएका प्रशासनिक समायोजनका क्रममा: साविकको धरान अस्पताललाई क्षेत्रीय अस्पतालमा समायोजन गरियो । पछि उक्त क्षेत्रीय अस्पताललाई कोशी अञ्चल अस्पतालसँग गाभियो ।

अन्ततः २०७४ मंसीर ११ गतेको मन्त्रिपरिषद्को निर्णयबाट उक्त बहुमूल्य जग्गा बी.पी. कोइराला स्वास्थ्य विज्ञान प्रतिष्ठानको नाममा नामसारी गरियो।

वर्तमान अवस्था र माग

हाल सो जग्गा लामो समयदेखि प्रयोगविहीन रहेको र त्यहाँ दुर्व्यसनीहरूको अखडा बन्दै गएको भन्दै स्थानीयले चिन्ता व्यक्त गरेका छन् । यद्यपि  धरान उपमहानगरपालिकाले त्यहाँ रहेका पुराना भवनहरू मर्मत गरी 'धरान स्वास्थ्य चौकी' र 'बर्थिङ्ग सेन्टर' सञ्चालन गरिरहेको छ ।

'धरानका आम नागरिकको चाहना पुरानै ठाउँमा नगर अस्पताल बनोस् भन्ने छ,' पत्रमा भनिएको छ, 'कानुनी रूपमा यो जग्गा प्रतिष्ठानको नाममा भए पनि नगर अस्पतालका लागि यही स्थान उपयुक्त भएकाले उक्त जग्गा धरान अस्पतालकै नाममा उपलब्ध गराइदिन अनुरोध गर्दछौँ ।'

नगरपालिकाले उपयुक्त जग्गाको अभावमा अस्पताल निर्माण प्रक्रिया अघि बढ्न नसकेको स्पष्ट पार्दै संघीय सरकारसँग यस विषयमा सकारात्मक निर्णय गरिदिन आग्रह गरेको छ ।