सैनिक स्रष्टा भीम विरही राईलाई 'युद्ध साहित्य पुरस्कार २०८२' प्रदान गरिने

धरान । युद्ध साहित्य पुरस्कार कोष, बेलायतको आयोजनामा यो वर्षको 'युद्ध साहित्य पुरस्कार २०८२' युवा साहित्यकार एवं सैनिक स्रष्टा भीम विरही राईलाई प्रदान गरिने भएको छ । 

उनको चर्चित कविता सङ्ग्रह 'बारुदले कोरेका अक्षरहरू' का लागि उक्त पुरस्कार अर्पण गर्न लागिएको हो । पुरस्कार अर्पणका लागि आगामी २०८२ वैशाख ११ गते सुनसरीको धरान-९ स्थित होटेल रत्न इनमा एक विशेष समारोहको आयोजना गरिएको छ । 

दिउँसो १ बजे सुरु हुने उक्त कार्यक्रममा प्रमुख अतिथिका रूपमा प्राज्ञ मुनाराज शर्माको उपस्थिति रहनेछ । विशेष अतिथि: देवान किराती र वक्ताहरूमा डा. अस्मिता विष्ट र जनकऋषि राई रहनेछन् ।

सैनिक जीवनका भोगाइ र युद्धका संवेदनाहरूलाई काव्यिक रूपमा प्रस्तुत गर्न सफल राईको उक्त कृतिले नेपाली युद्ध साहित्यको श्रीवृद्धिमा महत्त्वपूर्ण योगदान पुर्‍याएको भन्दै कोषले उनलाई पुरस्कृत गर्ने निर्णय गरेको हो । उक्त समारोहमा साहित्य क्षेत्रका विशिष्ट व्यक्तित्वको सहभागिता रहने आयोजकले जनाएको छ ।