धरान-८ को ११ घरेमा डोजर पुगेपछि सुकुम्बासी आन्दोलित : कावा मेयरले भने- डोजर चल्दैन

धरान । धरान उपमहानगरपालिकाले धरान-८ स्थित ११ घरेमा नयाँ घर निर्माण थालिएपछि धरान उपमहानगरपालिकाको डोजर पुगेको छ । स्थानीयले डोजर फर्काइदिएका छन् ।

सोमबार सुकुम्बासीका मागपत्र लिएर उपमहानगर पुगेका सुकुम्बासी नेतासमक्ष कावा प्रमुख अइन्द्रविक्रम बेघाले आफू नेतृत्वमा रहुन्जेल डोजर नचलाउने प्रतिबद्धता व्यक्त गरे । 

नेपाल बसोबास बस्ती संरक्षण समाजका केन्द्रीय अध्यक्ष कुमार कार्की, सुनसरी जिल्ला अध्यक्ष थामसेर लिम्बू, नगर अध्यक्ष आइतबहादुर लिम्बू र महिला एकता समाजकी अध्यक्ष मैयाँ श्रेष्ठद्वारा संयुक्त हस्ताक्षरित ध्यानाकर्षण-पत्रमा समाजले सुकुम्बासीको पुनःस्थापनाको मागसहित उच्चस्तरीय शक्तिशाली आयोग बनाई सुकुम्बासीहरूको निस्पक्ष छानबिन गर्न माग गरेको छ । छानबिनका लागि स्पष्ट स्रोत खुल्ने आस्रोतबाट आर्जित सम्पत्तिलाई आधार बनाइनुपर्ने समाजको माग छ ।

यस्तै भू-स्वामित्व बन्देज गर्दै अपार्मेन्टमा लाने विभेदको राजनीति नगर्न माग गरिएको छ । समाजले १ वर्षभित्र सुकुम्बासी मूक्त राष्ट्र घोषणा गर्ने गरी देश भर काम सुरु गर्न र १ वर्षभित्र सुकुम्बासी मूक्त नगर घोषणा गर्ने गरी आवश्यक योजना अघि सारी वार्ता र संवाद गर्न माग गरिएको छ ।