धरानका प्रहरी निरीक्षक दिवश कुँवर ‘चैत्र महिनाका सर्वोत्कृष्ट प्रहरी’ घोषित

धरानः कोशी प्रदेश प्रहरी कार्यालय, विराटनगरले इलाका प्रहरी कार्यालय धरानमा कार्यरत प्रहरी निरीक्षक दिवश कुँवरलाई २०८१ साल चैत्र महिनाको “सर्वोत्कृष्ट प्रहरी” (Best Police of the Month) घोषणा गरेको छ।

प्रहरी निरीक्षक कुँवरले धरान उपमहानगरपालिका वडा नं. ६ स्थित जंगलमा फेला परेको एक अन्दाजी ३०/३२ वर्षीया महिलाको शंकास्पद मृत्यु प्रकरणको सूक्ष्म अनुसन्धान गर्दै, सुरुवाती रूपमा कुनै प्रमाण नभएको रहस्यमय घटनालाई S.N.A. विश्लेषण प्रविधिबाट मृतकको पहिचान गर्न सफल भएका थिए।

उक्त घटनामा संलग्न सात जनाको पहिचान गरी, तत्काल पाँच जनालाई पक्राउ गर्दै कानुनी प्रक्रिया अघि बढाएको र घटनामा प्रयोग गरिएका तीनवटा मोटरसाइकलसमेत बरामद गरिएको विवरणमा उल्लेख छ। यससँगै शान्ति सुरक्षा तथा सुव्यवस्था कायम गर्नमा पनि निरीक्षक कुँवरको योगदान उल्लेखनीय रहेकाले उनि पुरल्कृत भएका हुन्।

उक्त अनुसन्धानमा देखिएको निरीक्षक कुँवरको निष्ठा, दक्षता, र व्यावसायिकता मूल्याङ्कन गर्दै प्रदेश प्रहरी कार्यालयले उनलाई “चैत्र महिनाको सर्वोत्कृष्ट प्रहरी” को उपाधिमा सम्मानित गरेको हो।

यस्तै, मोरङको जहदा गाउँपालिका वडा नं. ९ का एक युवकको हत्या मुद्दामा सई नवराज कार्कीले पनि गम्भीर अनुसन्धान गर्दै २०७८ सालको मुद्दामा संलग्न मुख्य अभियुक्तलाई पक्राउ गरी मोबाइलसहित नियन्त्रणमा लिन सफल भएका थिए।

उल्लेखनीय अनुसन्धान र उत्कृष्ट अपराध नियन्त्रण कार्यको मूल्यांकन गर्दै दुवै प्रहरी अधिकृतलाई चैत महिनाको ‘श्रेष्ठ प्रहरी’ घोषित गरिएको हो। प्रदेश प्रहरी कार्यालय विराटनगरले उनीहरूको योगदानलाई उच्च सम्मान गर्दै प्रमाणपत्रद्वारा सम्मान गरेको छ।