प्राइम भिजनको अभिमुखीकरण : एडिएचएम र इन्फर्मेशन टेक्नोलोजी पढ्ने विद्यार्थी लाभान्वित

धरान । धरानस्थित प्राइम भिजन इन्टरनेशनल कलेजले एड्भान्स डिप्लोमा इन हस्पिटालिटी म्यानेजमेन्ट र इन्फर्मेशन टेक्नोलोजीका नवआगन्तुक विद्यार्थीलाई अभिमुखीकरण सम्पन्न गरेको छ ।

शैक्षिक सत्र २०८३ का कक्षा ११ मा अध्ययन गर्ने एड्भान्स डिप्लोमा इन हस्पिटालिटी म्यानेजमेन्ट (एडिएचएम) तथा एड्भान्स डिप्लोमा इन इन्फर्मेशन टेक्नोलोजी (एडिआईटी) का नव आगन्तुक  विद्यार्थीका अभिमुखीकरण गरेको हो ।

इटहरीस्थित रामाडा बाइ विन्धम होटलमा ५० बढी नव आगन्तुक विद्यार्थीलाई कलेजका प्रमुख कार्यकारी अधिकृत अभिषेक श्रेष्ठले कलेजको परिचय, शैक्षिक विशेषता, व्यावसायिक शिक्षा तथा विद्यार्थीहरूको भावी करियर विकासका अवसरहरूबारे जानकारी गराए । 

अभिमुखीकरणमा प्रमुख कार्यकारी अधिकृत श्रेष्ठले आजको प्रतिस्पर्धात्मक विश्वमा विद्यार्थीहरूलाई शैक्षिक ज्ञान मात्र नभई व्यावहारिक सीप, अन्तर्राष्ट्रिय स्तरको एक्सपोजर र रोजगारमुखी शिक्षा आवश्यक रहेको उल्लेख गरे । उनले प्राइम भिजनले यिनै पक्षहरूलाई प्राथमिकतामा राखेर शिक्षा प्रदान गरिरहेको बताए । 

कार्यक्रमका विशेष अतिथि 'एलसीसीआई जीक्यू' का 'पार्टनरसीप हेड' दिवस योन्जनले विद्यार्थीहरूलाई धरानमै बसेर अन्तर्राष्ट्रिय स्तरको शिक्षा प्राप्त भइरहेको बताए ।

उनले प्राइम भिजन इन्टरनेशनल कलेजमार्फत विद्यार्थीहरूले विश्वस्तरीय पाठ्यक्रम, अन्तर्राष्ट्रिय मान्यता प्राप्त प्रमाणपत्र तथा विश्वव्यापी करियरका अवसरहरू हासिल गर्न सक्ने बताए । साथै, यस्ता कार्यक्रमहरूले विद्यार्थीहरूको आत्मविश्वास र व्यावसायिक क्षमता विकासमा महत्वपूर्ण भूमिका खेल्ने धारणा व्यक्त गरे । 

कलेजको निर्देशक दुर्गा सुवेदीले सम्पूर्ण विद्यार्थीलाई स्वागत गर्दै सफल शैक्षिक यात्राको शुभकामना दिए । उनले विद्यार्थीहरूलाई अनुशासित, मिहिनेती र लक्ष्यप्रति प्रतिबद्ध रहन प्रेरित गरे ।  कलेजले उनीहरूको उज्ज्वल भविष्य निर्माणका लागि आवश्यक सम्पूर्ण सहयोग गर्ने प्रतिबद्धता व्यक्त गरे । 

कार्यक्रमको विशेष आकर्षणका रूपमा विद्यार्थीहरूलाई रामाडा बाइ विन्धम होटलमा स्वागत नास्ताको व्यवस्था  थियो । विद्यार्थीले होटलका विभिन्न विभागको अवलोकन भ्रमण गरे ।  सो क्रममा विद्यार्थीले होटल उद्योगको वास्तविक कार्य प्रणाली तथा व्यावसायिक वातावरणबारे प्रत्यक्ष जानकारी लिएका थिए । 

विद्यार्थीलाई अध्ययनका लागि आवश्यक लर्निङ ब्याग, पुस्तक तथा हस्पिटालिटी कार्यक्रमका विद्यार्थीलाई किचन किटसमेत निःशुल्क वितरण गरिएको थियो ।

प्राइम भिजन इन्टरनेशनल कलेज हाल धरानको एकमात्र कलेज हो जसले विद्यार्थीहरूलाई 'प्लस-टु'सँगै एड्भान्स डिप्लोमा इन हस्पिटालिटी म्यानेजमेन्ट (एडिएचम) वा एड्भान्स डिप्लोमा इन इन्फर्मेशन टेक्नोलोजी (एडिआईटी) अध्ययन गर्ने अवसर प्रदान गर्दै आएको छ । डुअल डिग्री कार्यक्रममार्फत विद्यार्थीले विद्यालय तहको अध्ययनसँगै अन्तर्राष्ट्रिय स्तरको व्यावसायिक शिक्षा प्राप्त गर्ने अवसर पाउँदै आएका छन् । साथै, कक्षा १२ पूरा गरेपछि सशुल्क इन्टर्नसिपमा सहभागी भई व्यवहारिक अनुभव हासिल गर्ने विशेष सुविधासमेत उपलब्ध रहेको कलेजले जनाएको छ ।

'अभिमुखी कार्यक्रमले विद्यार्थीहरूलाई कलेजको शैक्षिक वातावरण, अन्तर्राष्ट्रिय साझेदारी, करियरका अवसर तथा व्यावसायिक शिक्षाको महत्वबारे जानकारी प्रदान गर्नुका साथै नयाँ शैक्षिक यात्राका लागि थप उत्साहित र प्रेरित बनाएको छ ।' कलेजका अध्यक्ष अनिल श्रेष्ठले भने ।