'तेस्रो धरान मेयर कप स्कुल ओलम्पिक' असार १० देखि, धरान खेलकुद मञ्चले आयोजना गर्ने

धरान । धरान उपमहानगरपालिकाले विगतमा आयोजना गर्दै आएको 'धरान मेयर कप स्कुल ओलम्पिक फेस्टिवल' ८ वर्षको अन्तरालपछि पुनः सञ्चालन हुने भएको छ । यस वर्षको फेस्टिवल आयोजना गर्ने जिम्मेवारी उपमहानगरपालिकाले धरान खेलकुद मञ्चलाई हस्तान्तरण गरेको छ ।

धरानमा पहिलो मेयर कप स्कुल ओलम्पिक २०७४ माघ २२ गतेदेखि आयोजना गरिएको थियो । उक्त स्पर्धामा ११ खेलकुदका विधामा सामुदायिक र संस्थागत विद्यालयका २ हजार ३ सय ६६ जना खेलाडीको सहभागिता थियो । 

दोस्रो स्कुल ओलम्पिक २०७५ मङ्सिर ५ गतेदेखि आयोजना गरिएको थियो । त्यसताका धरानका १३ सामुदायिक र ५१ संस्थागत विद्यालयको सहभागिता थियो । स्पर्धामा खेलकुदका १२ वटा विधा समेटिएको थियो । ३ हजार ९ सय विद्यार्थीले खेलाडीका रुपमा सहभागिता जनाएका थिए ।

आगामी असार १० गतेदेखि १७ गतेसम्म सञ्चालन हुने स्कुल ओलम्पिकमा फुटबल, क्रिकेट, भलिबल, सितोरियो कराते, तेक्वान्दो, बास्केटबल, टेबलटेनिस, सेपाकताक्रो, उसु र ब्याडमिन्टन गरी १० खेलको स्पर्धा हुनेछ । 

प्रतियोगिताका बारेमा जानकारी दिन शनिबार धरानमा आयोजित पत्रकार सम्मेलनमा मञ्चका अध्यक्ष किशोर राईले राष्ट्रिय तथा अन्तर्राष्ट्रिय स्तरका सक्षम खेलाडी उत्पादन गर्ने र नेपालमा ग्रासरुट खेलकुदको विकास गर्ने उद्देश्यले प्रतियोगिता आयोजना गरिएको बताए । 

विगतमा प्राविधिक कारणले स्थगित हुन पुगेको यो प्रतियोगितालाई यसपटक सफलतापूर्वक सम्पन्न गर्न उपमहानगरपालिकाले आर्थिक वर्ष २०८२/०८३ को बजेट विनियोजन गरी मञ्चलाई जिम्मेवारी दिएको छ ।

फेस्टिवलले खेल पूर्वाधारको विकाससँगै बालबालिकालाई ओलम्पिक खेल चार्टर अनुसारका नियमहरू सिकाउँदै खेलकुद क्षेत्रलाई थप व्यवस्थित बनाउन मद्दत पुग्ने विश्वास आयोजकको छ । 

प्रतियोगिताका लागि २६ लाख रुपैयाँ आम्दानी हुने र २४ लाख रुपैयाँ खर्च भई २ लाख रुपैयाँ बचत हुने अनुमान गरिएको छ । स्कुल ओलम्पिकका लागि धरान उपमहानगरपालिकाले १३ लाख रुपैयाँ विनियिजन गरेको छ । सार्वजनिक अनुमानित आयव्यय विवरणअनुसार प्रायोजकबाट ३ लाख रुपैयाँ सङ्कलन गरिने छ । दर्ता शुल्कबाट ५ लाख रुपैयाँ, सहयोग र दाताबाट ५-५ लाख रुपैयाँ प्राप्त हुने अनुमान गरिएको छ । 

अध्यक्ष राईले प्रतियोगितालाई सफल बनाउन सञ्चारकर्मी लगायत सम्पूर्ण सरोकारवालाहरूबाट सहयोगको अपेक्षा गरेका छन् ।

नियमावली सार्वजनिक 

प्रतियोगिताका लागि आयोजक समितिले नियमावलीसमेत सार्वजनिक गरेको छ । सबै खेलका नियम आयोजकले जारी गरेको छ । 

नियमअनुसार प्रतियोगितामा धरानभित्रका निजी तथा सामुदायिक विद्यालयका कक्षा-१० सम्मका विद्यार्थीहरूले भाग लिन पाउनेछन् भने जुनियरतर्फ आधारभूत तह (कक्षा-५ सम्म) का विद्यार्थीहरू सहभागी हुन पाउनेछन् । प्रतियोगितामा सहभागी हुने प्रत्येक विद्यालयले एक टिम मात्र दर्ता गर्न पाउनेछन् । टिम दर्ताका लागि 'फर्स्ट कम फर्स्ट सर्भिस' को आधारमा जम्मा ३२ टिमलाई मात्र स्थान दिइने आयोजकले जनाएको छ ।

सहभागी हुने टिमले १८ जना खेलाडी, मुख्य प्रशिक्षक, गोलकिपर प्रशिक्षक, फिजियो र टिम म्यानेजरसहित २२ जनाको नामवली असार ५ गतेभित्र दर्ता गराइसक्नुपर्नेछ । मुख्य प्रशिक्षकसँग एन्फाबाट प्राप्त लाइसेन्स अनिवार्य हुनुपर्ने नियम राखिएको छ ।

नकआउट प्रणालीमा खेलाइने यो प्रतियोगितामा कक्षा-१० सम्मका लागि प्रत्येक खेल ३०-३० मिनेट र कक्षा-५ सम्मका लागि २०-२० मिनेटको हुनेछ । खेल निर्धारित समयमा बराबरी भएमा टाई-ब्रेकर वा पेनाल्टी सुटआउटमार्फत निर्णय लिइनेछ ।

प्रतियोगितामा नियम विपरीत विद्यालय बाहिरका वा कक्षा-१० भन्दा माथिका खेलाडी खेलाएको प्रमाणित भएमा सम्बन्धित विद्यालयलाई २० हजार रुपैयाँ जरिवाना गरी आगामी ३ संस्करणसम्म निलम्बन गरिने तथा प्राप्त सम्पूर्ण पुरस्कार फिर्ता लिइने कडा नियम बनाइएको छ ।

कक्षा-१० सम्मका खेलहरू एन्फा एकेडेमी र धरान रङ्गशालामा तथा कक्षा-५ सम्मका खेलहरू डिपो मा.वि. को खेल मैदानमा खेलाइनेछन् । खेल अवधिभर खेलाडीहरू घाइते भएमा आयोजकले प्राथमिक उपचार मात्र उपलब्ध गराउनेछ । प्रतियोगिताको अन्त्यमा उत्कृष्ट खेलाडी तथा समूहहरूलाई ट्रफी, मेडल र प्रमाणपत्र प्रदान गरिनेछ । प्रतिकूल मौसम वा विशेष कारण परेमा आयोजकले खेलको समय वा स्थान परिवर्तन गर्न सक्ने अधिकार सुरक्षित राखेको छ ।