आर्थिक वर्ष २०८३/८४ को बजेट तर्जुमाका लागि धरान उपमहानगरपालिकाले लियो पत्रकारको सुझाव

धरान । धरान उपमहानगरपालिकाले आर्थिक वर्ष २०८३/८४ को बजेट तर्जुमा प्रक्रियाका लागि पत्रकार र सञ्चारकर्मीहरूसँग राय, सुझाव सङ्कलन गरेको छ ।

आइतबार उपमहानगरको सभाहलमा राय सुझाव दिँदै पत्रकारले स्थानीय सरकारले सञ्चार कार्यविधि लागू गर्नुपर्ने बताए । 

वरिष्ठ पत्रकार हर्ष सुब्बाले ऐन कार्यविधिभित्र रहेर सञ्चार क्षेत्रका समस्या र आवश्यकतालाई परिपूर्ति गर्न सुझाव दिए । उनले दीर्घकालीन र देखिने विकास गर्नुपर्नेमा जोड दिए । 

नेपाल पत्रकार महासङ्घ सुनसरीका अध्यक्ष सन्तोष काफ्लेले पत्रकार लेखनवृत्ति, लोककल्याणकारी विज्ञापन, सञ्चार ऐन र ऐन कानुनका विषय जोड दिए । 

सञ्चार उद्यमी मातृकाप्रसाद नेपालले धरान उपमहानगरले टुक्रे योजना र बारम्बार दोहोरिरहने योजनाको पुनर्मूल्याङ्कन गर्दै दीर्घकालीन र प्रभावकारी योजना तर्जुमा गर्नुपर्ने सुझाव दिए ।

वित्तीय प्रतिवेदन सार्वजनिक 

धरान उपमहानगरपालिकाले आर्थिक वर्ष २०८२/८३ को साउन १ गतेदेखि जेठ २७ गतेसम्मको अवधिमा भएको आम्दानी र खर्चको विवरण सार्वजनिक गरेको छ । 

आइतबार आयोजित पत्रकार भेटघाट कार्यक्रममा उपमहानगरपालिकाले आफ्नो वित्तीय प्रतिवेदन सार्वजनिक गर्दै चालू आर्थिक वर्षको हालसम्मको आर्थिक अवस्थाबारे जानकारी गराएको हो ।

सार्वजनिक विवरणअनुसार उपमहानगरपालिकाले उक्त अवधिमा कुल १ अर्ब ४४ करोड ८५ लाख १९ हजार १ सय ९९ रुपैयाँ ८४ पैसा वास्तविक आम्दानी गरेको छ । यो रकम कुल प्रस्तावित बजेटको ६४ दशमलव ८५ प्रतिशत हो ।

उपमहानगरपालिकाको कुल खर्चतर्फको अवस्थालाई हेर्दा वित्तीय व्यवस्थापनका विभिन्न क्षेत्रमा गरी कुल ४७ दशमलव ३ प्रतिशत खर्च भएको छ । जसमा चालू खर्चतर्फ ७० दशमलव २ प्रतिशत, पुँजीगत खर्चतर्फ २० दशमलव १ प्रतिशत र वित्तीय खर्चतर्फ ४८ दशमलव १ प्रतिशत प्रगति हासिल भएको प्रतिवेदनमा उल्लेख छ ।

उपमहानगरपालिकाले बजेट खर्च र आम्दानीको अवस्थाका साथै पुँजीगत तथा वित्तीय खर्चको वास्तविक तथ्याङ्क सार्वजनिक गर्दै यस विषयमा पत्रकारहरूबाट राय र सुझावहरू सङ्कलन गरेको छ । उपमहानगरपालिकाले सार्वजनिक गरेको विवरणलाई समीक्षा गर्दै पत्रकारहरूले आगामी आर्थिक वर्षमा आन्तरिक आयको अनुमान वास्तविकताको नजिक हुनुपर्ने बताए ।