कक्षा–१२ मा ‘ए प्लस’ ल्याउने मेघा हिमालयन कलेजका १३ विद्यार्थी सम्मानित

धरान । सुनसरीको धरानस्थित धरान मेघा हिमालयन कलेजले राष्ट्रिय परीक्षा बोर्डद्वारा प्रकाशित कक्षा–१२ को नतिजामा ‘ए प्लस’ ग्रेड हासिल गर्ने १३ जना विद्यार्थीलाई सम्मान गरेको छ।

सोमबार कलेजमा आयोजित कार्यक्रममा विज्ञान संकायका ९, व्यवस्थापन संकायका ३ र होटल व्यवस्थापन संकायका १ गरी कुल १३ जना ‘ए प्लस’ प्राप्त विद्यार्थीलाई सम्मान गरिएको कलेजले जनाएको छ।

उत्कृष्ट नतिजा हासिल गरेका अधिकांश विद्यार्थी उच्च शिक्षा अध्ययन तथा इन्जिनियरिङ र चिकित्सा शिक्षाको तयारीमा रहेका कारण कार्यक्रममा उनीहरूका अभिभावकको उपस्थिति थियो। अभिभावकहरूले विद्यार्थीका तर्फबाट सम्मान ग्रहण गरे ।

कार्यक्रममा कलेजका अध्यक्ष राजेश विद्रोही, शैक्षिक निर्देशक अर्जुन घिमिरे तथा शिक्षकहरू देवराज रेग्मी र प्रमोद श्रेष्ठले विद्यार्थी तथा अभिभावकलाई खादा, अबिर र सम्मानपत्र प्रदान गर्दै सम्मान गरे।

सो अवसरमा अध्यक्ष विद्रोहीले उत्कृष्ट नतिजा हासिल गर्न योगदान गर्ने शिक्षकप्रति आभार व्यक्त गरे । सफल विद्यार्थी र अभिभावकलाई बधाई दिए । उनले गुणस्तरीय शिक्षासँगै अतिरिक्त क्रियाकलापलाई पनि प्राथमिकतामा राख्दै आएको बताए । कलेजप्रति विद्यार्थी र अभिभावकको आकर्षण बढ्दै गएको बताए ।

कलेजले आगामी दिनमा शैक्षिक गुणस्तर अभिवृद्धि र विद्यार्थीको सर्वाङ्गीण विकासका लागि अझ प्रभावकारी रूपमा काम गर्ने प्रतिबद्धता जनाएको छ ।