धरान बस टर्मिनल : एक बिघा सात कट्ठा क्षेत्रफलमा भव्य संरचना, समुद्घाटनसँगै सञ्चालनमा

धरान । तीन दशकदेखि फराकिलो बसपार्कको प्रतीक्षामा रहेको धरानले अन्ततः आधुनिक स्मार्ट बसपार्क सञ्चालनमा ल्याएको छ । धरान उपमहानगरपालिका–८, तीनकुने सुन्दर बस्ती विकास आयोजनाअन्तर्गत करिब एक बिघा सात कट्ठा (करिब २७ कट्ठा) क्षेत्रफलमा निर्माण गरिएको बसपार्क शनिबारदेखि औपचारिक रूपमा सञ्चालनमा आएको छ ।

शनिबार आयोजित विशेष समारोहमा धरान उपमहानगरपालिकाका कार्यवाहक नगर प्रमुख आइन्द्रविक्रम बेघाले बसपार्क उद्घाटन गरे ।

बसपार्कमा भूमिगत पार्किङसहित तीनतले टर्मिनल भवन निर्माण गरिएको छ । बसपार्कको बेसमेन्टमा एक हजार ८४० वर्गमिटर क्षेत्रफलमा पार्किङ सुविधा छ भने दुई वटा सवारी प्रवेश र्‍याम्प, दुई वटा भर्‍याङ तथा भविष्यमा लिफ्ट जडान गर्न मिल्ने संरचना तयार गरिएको छ।

भुइँतलामा १०५ सिट क्षमताको यात्रु प्रतीक्षालय, २५ वटा टिकट काउन्टर, एटीएम, सिसिटिभी तथा सुरक्षा कक्ष, महिला, पुरुष र अपाङ्गतामैत्री सार्वजनिक शौचालय, प्राथमिक उपचार कक्ष, मिनीमार्ट तथा व्यावसायिक प्रयोजनका लागि छुट्याइएका स्थान निर्माण गरिएको छ । पहिलो तलामा १४ वटा व्यावसायिक सटर, संलग्न शौचालयसहित १२ वटा लजका कोठा, रेस्टुरेन्ट, कफी सप, खुला व्यावसायिक क्षेत्र तथा बसपार्क व्यवस्थापन कार्यालय सञ्चालन गर्न सकिने छ ।

बसपार्क परिसरमा एकैपटक ३८ वटा ठूला बस र १८ वटा जिप, ल्यान्डरोभर तथा ट्याक्सी पार्किङ गर्न सकिने क्षमता छ । साथै ८० हजार लिटर क्षमताको खानेपानी तथा अग्निनियन्त्रण ट्याङ्कीसमेत निर्माण गरिएको छ ।

धरान उपमहानगरपालिकाका अनुसार आयोजनाको कुल लागत अनुमान ३३ करोड ७० लाख ४७ हजार २३८ रुपैयाँ छ । प्रारम्भिक ठेक्का सम्झौता २५ करोड ४१ लाख ६७ हजार ३१९ रुपैयाँमा भए पनि ड्रइङ–डिजाइन परिमार्जनपछि लागत २४ करोड ९१ लाख ३ हजार ९५८ रुपैयाँ कायम गरिएको थियो । हालसम्म आयोजनामा २४ करोड ८६ लाख ९ हजार १४९ रुपैयाँ खर्च भइसकेको छ ।

बसपार्क निर्माणका लागि २०७८ असार ३० गते ठेक्का सम्झौता भई २०८१ असार ३० गते सम्पन्न गर्ने लक्ष्य राखिएको थियो । उच्च अदालत विराटनगरको अन्तरिम आदेशका कारण निर्माण प्रभावित भएपछि नौ महिना म्याद थप गरी काम सम्पन्न गरिएको हो । सर्वोच्च अदालतमा विचाराधीन मुद्दाका कारण दक्षिण–पश्चिमतर्फको केही भाग भने अझै निर्माण हुन बाँकी छ ।
यो बसपार्क निर्माणको अवधारणा तीनकुने सुन्दर बस्ती विकास आयोजनाअन्तर्गत अघि सारिएको थियो । 

२०६२ वैशाख २० गते मन्त्रिपरिषद्को बैठकले आयोजना स्वीकृत गरेपछि १ सय ७ जना जग्गाधनीको १३ बिघा ६ कट्ठा १९ धुर जग्गा अधिग्रहण गरी एउटै कित्तामा विकास प्रक्रिया अघि बढाइएको थियो । त्यसमध्ये ३८ कट्ठा जग्गा बहुउद्देश्यीय क्षेत्रका लागि छुट्याइएपछि सुरु भएको विवाद जिल्ला, उच्च हुँदै सर्वोच्च अदालतसम्म पुगेको थियो ।

धरानले लामो समयसम्म भानुचोकस्थित साँघुरो बसपार्कबाटै सेवा सञ्चालन गर्दै आएको थियो । त्यहाँबाट धरान आउने–जाने तथा धरानलाई ट्रान्जिट बनाएर पहाड र तराईतर्फ जाने सबै सार्वजनिक सवारी सञ्चालन हुँदै आएका थिए ।

स्मार्ट बसपार्क निर्माणको ठेक्का विकोई–गीताञ्जली जेभी, दुहबीले पाएको थियो । उद्घाटन कार्यक्रममा पूर्व नगर प्रमुख तिलक राई, पूर्व उपप्रमुख मञ्जु भण्डारी तथा विभिन्न वडाका वडाध्यक्षहरूको उपस्थिति रहेको थियो।

धरान उपमहानगरपालिकाका वरिष्ठ इन्जिनियर सुरज श्रेष्ठले सर्वोच्च अदालतमा विचाराधीन मुद्दाका कारण बसपार्कको दक्षिण–पश्चिम भाग निर्माण हुन बाँकी रहेको बताए । उनका अनुसार बसपार्कको संरचना भविष्यका आवश्यकतालाई ध्यानमा राखेर निर्माण गरिएको छ ।

धरानका स्थानीय मुरारी सुवेदीले सामाजिक सञ्जालमार्फत बसपार्क निर्माणमा योगदान पुर्‍याउने जग्गाधनी, विभिन्न कार्यकालका जनप्रतिनिधि, कर्मचारी, निर्माण कम्पनी, यातायात व्यवसायी, सञ्चारकर्मी तथा समन्वय गर्ने सबै पक्षप्रति धन्यवाद व्यक्त गरेका छन् । उनले लामो समयदेखिको विवाद समाधान गर्दै आयोजना सम्पन्न हुनु धरानका लागि महत्त्वपूर्ण उपलब्धि भएको उल्लेख गरेका छन् ।