बीपी प्रतिष्ठान बाहिरका थप १२ औषधि पसल सिल, होटलबाट १३८ पुर्जा र संवेदनशील औषधि बरामद

सुनसरी । बीपी कोइराला स्वास्थ्य विज्ञान प्रतिष्ठान आसपास सक्रिय बिचौलिया सञ्जालमाथिको अनुसन्धान तीव्र बन्दै गएको छ । संयुक्त अनुगमन टोलीले शुक्रबार थप १२ औषधि पसल सिलबन्दी गर्नुका साथै दुई होटल तथा लजबाट बिरामीका १३८ वटा पुर्जी, स्वास्थ्य बीमा कार्ड र 'लोरी' तथा 'मिजोभिया' जस्ता संवेदनशील औषधि बरामद गरेको छ ।

बीपी कोइराला स्वास्थ्य विज्ञान प्रतिष्ठानको मुख्य प्रवेशद्वार बाहिर सञ्चालित थप १२ वटा औषधि पसल शुक्रबार सिलबन्दी गरिएका हुन् । यसअघि बिहीबार सोही क्षेत्रमा आठ वटा औषधि पसल सिल गरिएको थियो । दुई दिनमा सिलबन्दी गरिएका औषधि पसलको सङ्ख्या २० पुगेको छ ।

बीपी प्रतिष्ठानमा उपचारका लागि आउने बिरामीलाई लक्ष्य बनाएर कमिसनको लोभमा सक्रिय रहेको आशंकित बिचौलिया सञ्जालमाथि अनुसन्धान गर्ने क्रममा औषधि व्यवस्था विभाग विराटनगर, इलाका प्रशासन कार्यालय सुनसरी र इलाका प्रहरी कार्यालय धरानको संयुक्त टोलीले अनुगमनलाई तीव्र बनाएको हो ।

औषधि व्यवस्था विभाग विराटनगरका निरीक्षण शाखाका फार्मेसी सुपरभाइजर एलन खड्काका अनुसार औषधि पसल सञ्चालनका लागि आवश्यक कानुनी कागजात नपाइएको, व्यवसाय नवीकरण नगरिएको, दर्ताप्राप्त फार्मासिस्ट अनुपस्थित रहेको तथा अनुगमनका क्रममा केही सञ्चालक पसल बन्द गरेर सम्पर्कविहीन भएको पाइएकाले ती पसल सिलबन्दी गरिएको हो ।

सिल गरिएका पसलमा अविष्ट फार्मेसी, सेवारो फार्मेसी, जुनतारा फार्मेसी, फ्रेन्ड्स फार्मेसी, साल्नी फार्मेसी, कौसल फर्मा, साकेला फार्मेसी, जनसेवक मेडिको, सुन्दर मेडिकल, सिम्पी फार्मेसीलगायत रहेका छन् ।

सिलबन्दी गरिएका पसलका सञ्चालकलाई आवश्यक कागजातसहित औषधि व्यवस्था विभागमा उपस्थित हुन निर्देशन दिइएको छ । कागजातको परीक्षणपछि प्रचलित कानुनबमोजिम थप कारबाही प्रक्रिया अघि बढाइने विभागले जनाएको छ ।

यसअघि बीपी प्रतिष्ठान परिसरबाट बिचौलियाको आरोपमा पक्राउ परेका १२ जनामाथि अनुसन्धानका लागि अदालतबाट सात दिनको म्याद थप गरिएको थियो । त्यसपछि औषधि व्यवसायीहरूले पसल बन्द गरी आन्दोलन थालेका थिए। सोही क्रममा प्रशासनले औषधि पसलहरूको अनुगमनलाई निरन्तरता दिएको हो।

अनुगमनका क्रममा औषधि पसलसँगै आसपासका होटल तथा लजबाट पनि शंकास्पद सामग्री फेला परेको छ। संयुक्त टोलीले धरान–१८ आदर्शमार्गस्थित तन्दुरी भोजनालय तथा गोल्डेन लाइफ होटल एन्ड लजबाट सात वटा स्वास्थ्य बीमा कार्ड, बीपी प्रतिष्ठानको काउन्टरबाट काटिएका १३८ वटा बिरामीका पुर्जी, दुई थान नेपाली नागरिकता तथा विभिन्न संवेदनशील औषधि बरामद गरेको जनाएको छ।

इलाका प्रहरी कार्यालय धरानका प्रहरी नायब उपरीक्षक (डीएसपी) भिषणबाबु राईका अनुसार बरामद सामग्रीमा 'लोरी–१' लेखिएका १२७ ट्याब्लेट, 'लोरी–२' लेखिएका ३७८ ट्याब्लेट, 'भिभेल' लेखिएका १३ क्याप्सुल, 'मिजोभिया ५ एमएल' को एक सिसी तथा 'नाटो फोल–डी' लेखिएका नौ क्याप्सुल रहेका छन्।

उनका अनुसार सबै औषधि तथा अन्य सामग्री इलाका प्रहरी कार्यालय धरानमा राखी थप अनुसन्धान भइरहेको छ।
प्रहरीका अनुसार होटलका कोठा भाडामा लिएर बिरामीलाई सहयोग गर्ने बहानामा बिचौलिया समूहले संगठित रूपमा गतिविधि सञ्चालन गरेको हुन सक्ने आशंकासमेत गरिएको छ।

चिकित्सकहरूका अनुसार बरामद गरिएको 'मिजोभिया' अत्यन्त संवेदनशील औषधि हो, जुन शल्यक्रियाअघि बिरामीलाई बेहोस बनाउन चिकित्सकीय निगरानीमा प्रयोग गरिन्छ। यसको असर तत्काल देखिने भएकाले चिकित्सकीय प्रयोजनबाहेक प्रयोग भएमा गम्भीर दुरुपयोगको जोखिम रहने उनीहरूको भनाइ छ।

त्यसैगरी 'लोरी' औषधि अत्यधिक चिन्ता तथा मानसिक तनाव भएका बिरामीलाई चिकित्सकको प्रत्यक्ष निगरानीमा मात्र प्रयोग गराइने औषधि हो। यसले निद्रा लाग्ने तथा लठ्याउने प्रभाव पार्ने भएकाले यसको दुरुपयोग र लत लाग्ने जोखिम उच्च रहने चिकित्सकहरूले बताएका छन्।