बसपार्क सारिएपछि चहलपहलविहीन भानुचोक, गुल्जार : नयाँ बसपार्क (तस्बिरहरु हेर्नुहोस्)

सुनसरी । बसपार्क सारिएपछि भानुचोक–घण्टाघर परिसर सुनसानजस्तै बनेको छ । भानुचोकबाट चल्ने सबै सार्वजनिक सवारीसाधन धरान–८ स्थित तीनकुने सुन्दर बस्ती विकास आयोजना क्षेत्रबाट सञ्चालन गर्ने गरी सारिएपछि भानुचोक–घण्टाघर क्षेत्र सुनसानजस्तै बनेको हो । तीनकुने सुन्दर बस्ती विकास आयोजना क्षेत्रमा बसपार्क सारिएपछि भानुचोक, देशीलाइन र पुतलीलाइन खुला स्थलजस्तै बनेका छन् । अरूबेला सवारीसाधन पार्किङ गर्ने स्थानसमेत पाउन नसकिने अवस्था थियो ।

भानुचोकमा रहेका सबै सार्वजनिक सवारीसाधनका काउन्टर सारिएपछि भानुचोक–धरान घण्टाघर परिसरमा अबदेखि स्थानीय रुटका सिटी सफारी र टेम्पो मात्र चल्ने भएका छन् । मुलुककै सबैभन्दा साँघुरो बसपार्कका रूपमा चिनिएको धरानको भानुचोक बसपार्क करिब ५० वर्षअघि दर्जनौँ सवारीसाधनका लागि निर्माण गरिएको थियो । पछिल्ला दुई दशकयता निजी तथा सार्वजनिक सवारीसाधन, यात्रु र दुईपाङ्ग्रे मोटरसाइकलको चाप अत्यधिक बढेपछि भानुचोक बिहानदेखि बेलुकासम्म अस्तव्यस्त हुने गरेको थियो । त्यसमाथि पछिल्लो एक दशकयता रिक्सालाई विस्थापित गर्दै एक हजारभन्दा बढी सिटी सफारी पनि भानुचोक–धरान घण्टाघर परिसरमै यात्रु खोज्दै कुद्न थालेपछि अवस्था झन् बेहाल बनेको थियो ।

धरान उपमहानगरपालिकाले असार १३ गते भानुचोक–धरान घण्टाघर परिसरको बसपार्क नयाँ बसपार्कमा सार्ने औपचारिक घोषणा गर्दै टर्मिनल भवन र बसपार्कको उद्घाटन गरेको थियो । भानुचोक–धरान घण्टाघर परिसरमा पहाडी रुट, पूर्व जाने, पश्चिम जाने, विराटनगर जाने रुटका सार्वजनिक सवारीसाधनदेखि रातो नम्बर प्लेटका सवारीसाधनलाई समेत पार्किङ गर्न निषेध गरिएको छ ।

भानुचोक क्षेत्र सुनसान बने पनि नयाँ स्मार्ट बसपार्क आसपासको तीनकुने सुन्दर बस्ती विकास आयोजना क्षेत्र भने शुक्रबारदेखि नै गुल्जार देखिएको छ । सुनसरीको दुहबीस्थित एम/एस बिकोइ गीताञ्जली जेभीले पूर्व सम्झौताअनुसार ०८१ असारको अन्त्यमा नयाँ बसपार्क निर्माण सम्पन्न गरेको हो । तीनकुने सुन्दर बस्ती विकास आयोजना क्षेत्रमा ८० भन्दा बढी जग्गाधनीको जग्गालाई ल्याण्ड पुलिङ प्रणाली अपनाएर एकीकृत कित्ता बनाई २७ कट्ठा जग्गामा बसपार्क निर्माण गरिएको हो ।

स्थानीय समुदायले बसपार्कका लागि जग्गा दिने सहमति जनाएपछि ०७८ सालमै सरकारबाट समपूरक कोषमार्फत ५० प्रतिशत बजेट प्राप्त भएको थियो । त्यसमा धरान उपमहानगरपालिकाले ५० प्रतिशत थप गरी कुल २४ करोड ८६ लाख ९ हजार १४८ रुपैयाँको लागतमा बसपार्क निर्माण सम्पन्न गरेको हो । नयाँ बसपार्क निर्माण भए पनि सञ्चालन गर्ने जिम्मा इटहरीका सुमन राईको कम्पनी ब्रदर्स ट्रेडर्सलाई भ्याटसहित वार्षिक १ करोड २ लाख रुपैयाँमा ठेक्का दिइएको छ । बसपार्कको पार्किङ स्थलमा एकैसाथ ३८ वटा ठूला बस तथा १८ वटा जिप, ल्यान्डरोभर र ट्याक्सी पार्किङ गर्ने क्षमता रहेको छ ।