डिपो बास्केटबलको उपाधि प्रभातलाई

धरान । डिपो माध्यमिक विद्यालयले आयोजना गरेको पाँचौँ अन्तरविद्यालय मेजर श्रवणकुमार लिम्बू स्मृति बास्केटबल रनिङ कपको उपाधि प्रभात सेकेन्डरी इङ्लिस बोर्डिङ स्कुल, धरानले जितेको छ। फाइनलमा प्रभातले इटहरीस्थित पाराडाइज बोर्डिङ स्कुललाई ३८–३० अङ्कले पराजित गर्दै उपाधि आफ्नो नाममा लेखायो।

चार क्वाटरमा सम्पन्न फाइनल खेलमा प्रभातले पहिलो, तेस्रो र चौथो क्वाटर क्रमशः ५–४, ७–३ र १६–१२ अङ्कले जितेको थियो। दोस्रो क्वाटर भने पाराडाइजले ११–१० अङ्कले आफ्नो पक्षमा पारेको थियो।

उपाधिसँगै प्रभातले नगद २० हजार रुपैयाँ, ट्रफी, मेडल र प्रमाणपत्र प्राप्त गर्यो। उपविजेता पाराडाइजले नगद १० हजार रुपैयाँसहित ट्रफी, मेडल र प्रमाणपत्र प्राप्त गर्यो। फाइनल खेलका म्यान अफ द म्याच प्रभातका नेमसाङ मगर घोषित भए।

प्रतियोगिताभरको प्रदर्शनका आधारमा पाराडाइजका सक्षम तामाङ उदयमान खेलाडी, प्रभातका शुसान्त उराव सर्वोत्कृष्ट (महत्त्वपूर्ण) खेलाडी तथा हिमालयन मेघा एकेडेमी, धरानका सङ्गम ठाकुर सर्वाधिक अङ्ककर्ता घोषित भए।
कक्षा १० सम्मका विद्यार्थीलाई लक्षित गरी आयोजित प्रतियोगितामा मोरङ, सुनसरी र झापाका १६ विद्यालयको सहभागिता रहेको थियो।

प्रतियोगिता विद्यालयका पूर्वअध्यक्ष तथा डिपो सार्वजनिक शैक्षिक गुठीका संस्थापक अध्यक्ष स्वर्गीय मेजर श्रवणकुमार लिम्बूको स्मृतिमा आयोजना गरिएको हो। विद्यालयको नेतृत्व गरिरहेकै क्रममा कोरोना महामारीका कारण उनको २०७८ साल साउन १५ गते निधन भएको थियो।