धमाधम बन्दैछ, पब्लिक हाइस्कुल

धरान । धरान-१२ चतरा लाइनस्थित श्री पब्लिक हाइस्कुल भौतिक विकासको प्रगतिपथमा अघि बढ्दै गइरहेको छ ।सामुदायिक विद्यालयलाई हेयका दृष्टिले हेरिनु हुँदैन भन्ने दृष्टान्त बनेको छ, विद्यालय । 

पछिल्लो समय शिक्षा तथा खेलकुद मन्त्रालयअन्तर्गतको केन्द्रीय आयोजना कार्यान्वयन इकाईको ३ करोड ७५ लाख रुपैयाँ लागतमा  तीन तले, १२ कोठे भवन निर्माणाधीन छ । 

सुनसरी जिल्लामै  सीएलपीआईयूको एकमात्र कार्यक्रमका हो, कक्षाकोठा प्रयोजनका लागि,' विद्यालयका प्राचार्य डा. इन्द्रमोहन झाले भने, 'अहिले धमाधम बनिरहेको छ ।' 

आगामी कार्तिक महिनासम्म भवन हस्तान्तरण गर्नुपर्ने सहमति छ । तर निर्माण पक्षले धमाधम काम गरिरहेकाले भदौसम्ममा हस्तान्तरण हुन सक्ने इन्जिनियर सानु सिंहले बताए । 

मन्त्रालयले केन्द्रीय आयोजना कार्यान्वयन इकाईमार्फत २ हजार बढी विद्यार्थी भएका विद्यालयका लागि भवन निर्माण गर्दै आएको छ । 

२००३ सालमा स्थापना भएको विद्यालय दुई बिघा जग्गा फैलिएको छ । नर्सरीदेखि कक्षा १२ सम्म सञ्चालनमा रहेको विद्यालय अङ्ग्रेजी माध्यममा समेत पढाइ हुँदै आएको छ । विद्यालयमा ४ हजार बढी विद्यार्थी अध्ययनरत छन् ।