कोशी नदीको पूर्वी तटबाट प्रहरीद्वारा ३०८ किलोग्राम गाँजा बरामद

सुनसरी । जिल्ला प्रहरी कार्यालय सुनसरी र इलाका प्रहरी कार्यालय भाण्टाबारीबाट खटिएको संयुक्त प्रहरी टोलीले कोशी नदीको पूर्वी तटको पानीमा तैरिरहेको अवस्थामा ३०८ किलोग्राम गाँजा बरामद गरेको छ ।

प्रहरीले गएराति करिब साढे १ बजे सुनसरीको कोशी गाउँपालिका–७ स्थित केराबारी र भाण्टाबारीबीच पर्ने कोशी नदीको पूर्वी तटबाट उक्त गाँजा बरामद गरेको हो । उक्त क्षेत्र नेपाल–भारत दशगजा नजिक तथा छोटी भन्सार आसपासको क्षेत्र हो ।

जिल्ला प्रहरी कार्यालय सुनसरीका सहायक सूचना अधिकारी प्रहरी निरीक्षक हेमराज ओलीका अनुसार गस्तीमा रहेको टोलीले पानीमा तैरिरहेको शंकास्पद वस्तु निकाली खोलेर हेर्दा तयारी गाँजा फेला परेको हो । उनका अनुसार तस्करहरूले प्रहरीको निगरानी छल्न कोशी नदीमा तैराएर गाँजा ल्याउने उपाय अपनाएको हुन सक्ने प्रारम्भिक अनुमान गरिएको छ ।

प्रहरीका अनुसार तस्करहरूले गाँजा ओसारपसारका लागि विभिन्न उपाय अपनाउने गरेका छन् । धनकुटाको दक्षिणी भेगस्थित शहीदभूमि गाउँपालिका क्षेत्रमा उत्पादन हुने गाँजा केही तस्करहरूले बाँसको चेफासँगै कोशी नदीमा बगाएर सीमावर्ती क्षेत्रसम्म ल्याउने गरेको प्रहरीको आशंका छ ।