मेजर श्रवणकुमार बास्केटबलमा आइतबारसमेत चार खेल

धरान । डिपो माध्यमिक विद्यालयले आयोजना गरेको पाँचौं अन्तरविद्यालय मेजर श्रवणकुमार लिम्बू स्मृति बास्केटबल रनिङ कप प्रतियोगिताको तेस्रो दिन आइतबार चार खेल सम्पन्न भएका छन्। 

प्रतियोगितामा हिमालयन मेघा एकाडेमी, धरान, हिमशिखर इङ्लिस बोर्डिङ स्कुल, इटहरी, पाराडाइज बोर्डिङ स्कुल, इटहरी र प्रभात सेकेन्डरी इङ्लिस बोर्डिङ स्कुल, धरान विजयी हुँदै सेमिफाइनलमा प्रवेश गरेका छन्।

पहिलो खेलमा हिमालयन मेघा एकाडेमीले दिल्ली पब्लिक स्कुललाई ४०–१५ अंकले पराजित गर्यो। हिमालयन मेघाले चारै क्वार्टरमा क्रमशः ११–२, १२–५, १०–४ र ७–४ अंक जोड्दै सहज जित निकालेको थियो। खेलमा हिमालयन मेघाका सङ्गम ठाकुर 'म्यान अफ द म्याच' घोषित भए।

दोस्रो खेलमा हिमशिखर इङ्लिस बोर्डिङ स्कुलले आयोजक डिपो माध्यमिक विद्यालयलाई अतिरिक्त समयमा ३०–२९ अंकले पराजित गर्यो। निर्धारित समयमा दुवै टोलीले २८–२८ अंकको बराबरी खेलेका थिए। हिमशिखरले चार क्वार्टरमा ८–५, ११–९, ७–८ र २–६ अंक जोडेको थियो। अतिरिक्त समयमा हिमशिखरले २ तथा डिपोले १ अंक जोड्दा हिमशिखर विजयी बन्यो। खेलमा हिमशिखरका स्वयम माझी 'म्यान अफ द म्याच' घोषित भए।

तेस्रो खेलमा पाराडाइज बोर्डिङ स्कुल, इटहरीले सुनाखरी एकाडेमीलाई ३५–८ अंकले पराजित गर्यो। पाराडाइजले क्रमशः ४–६, १०–०, १३–० र ८–२ अंक जोडेको थियो। खेलको कुल अंक गणनाअनुसार अन्तिम नतिजा ३५–८ हुन पुगेको हो। खेलमा पाराडाइजका सक्षम तामाङ 'म्यान अफ द म्याच' घोषित भए।

अन्तिम खेलमा प्रभात सेकेन्डरी इङ्लिस बोर्डिङ स्कुल, धरानले चिल्ड्रेन्स एकाडेमीलाई २८–२४ अंकले पराजित गर्यो। प्रभातले चार क्वार्टरमा क्रमशः ८–५, ८–८, १०–६ र २–५ अंक जोड्दै जित निकालेको थियो। खेलमा प्रभातका शुसान्त उराव 'म्यान अफ द म्याच' घोषित भए।

कक्षा १० सम्मका विद्यार्थीलाई लक्षित प्रतियोगितामा मोरङ, सुनसरी र झापाका १६ विद्यालयको सहभागिता रहेको छ। प्रतियोगिताको विजेता टोलीले नगद २० हजार रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेताले नगद १० हजार रुपैयाँसहित ट्रफी, मेडल र प्रमाणपत्र पाउनेछ। यसका साथै उत्कृष्ट खेलाडी, सर्वाधिक स्कोरकर्ता (हाइ स्कोरर) र राइजिङ प्लेयरलाई पनि ट्रफी तथा प्रमाणपत्र प्रदान गरिने आयोजकले जनाएको छ।

प्रतियोगिता विद्यालयका पूर्वअध्यक्ष तथा डिपोट सार्वजनिक शैक्षिक गुठीका संस्थापक अध्यक्ष स्वर्गीय मेजर श्रवणकुमार लिम्बुको स्मृतिमा आयोजना गरिएको हो।