डिपो बास्केटबलको फाइनलमा पाराडाइज र प्रभात

धरान । डिपो माध्यमिक विद्यालयले आयोजना गरेको पाँचौं अन्तरविद्यालय मेजर श्रवणकुमार लिम्बू स्मृति बास्केटबल रनिङ कप प्रतियोगिताको फाइनलमा प्रभात सेकेन्डरी इङ्लिस बोर्डिङ स्कुल, धरान र पाराडाइज बोर्डिङ स्कुल, इटहरी प्रवेश गरेका छन्।

पहिलो सेमिफाइनलमा प्रभात सेकेन्डरी इङ्लिस बोर्डिङ स्कुलले हिमालयन मेघा एकेडेमी, धरानलाई ४७–४६ अङ्कले पराजित गर्दै उपाधिनजिक पुगेको हो। निकै प्रतिस्पर्धात्मक बनेको खेलमा प्रभातले पहिलो, तेस्रो र चौथो क्वाटरमा अग्रता बनाउँदै जित निकालेको थियो। क्वाटरगत स्कोर क्रमशः १५–१०, ४–१५, २०–१३ र ८–८ रहेको थियो। प्रभातका नेमसाङ मगर खेलको ‘म्यान अफ द म्याच’ घोषित भए ।

दोस्रो सेमिफाइनलमा पाराडाइज बोर्डिङ स्कुल, इटहरीले हिमशिखर इङ्लिस बोर्डिङ स्कुल, इटहरीलाई ३९–२८ अङ्कले पराजित गर्दै फाइनलमा स्थान सुरक्षित गर्यो। पाराडाइजले पहिलो क्वाटर १५–४ ले आफ्नो पक्षमा पारेको थियो भने दोस्रो, तेस्रो र चौथो क्वाटरको स्कोर क्रमशः ५–७, ५–९ र ९–८ रहेको थियो। पाराडाइजका प्रिन्स खत्री ‘म्यान अफ द म्याच’ घोषित भए।

उपाधिका लागि पाराडाइज बोर्डिङ स्कुल, इटहरी र प्रभात सेकेन्डरी इङ्लिस बोर्डिङ स्कुल, धरानबीच मंगलबार फाइनल खेल हुनेछ। पाराडाइज यस प्रतियोगिताको चौथो संस्करणको उपविजेता टोलीसमेत हो।

कक्षा १० सम्मका विद्यार्थीलाई लक्षित प्रतियोगितामा मोरङ, सुनसरी र झापाका १६ विद्यालय सहभागी छन्। प्रतियोगिताको विजेताले नगद २० हजार रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेताले नगद १० हजार रुपैयाँसहित ट्रफी, मेडल र प्रमाणपत्र पाउनेछ। साथै उत्कृष्ट खेलाडी, उच्च स्कोरर र राइजिङ प्लेयरलाई पनि ट्रफी तथा प्रमाणपत्र प्रदान गरिने आयोजकले जनाएको छ।

प्रतियोगिता विद्यालयका पूर्वअध्यक्ष तथा डिपोट सार्वजनिक शैक्षिक गुठीका संस्थापक अध्यक्ष स्वर्गीय मेजर श्रवणकुमार लिम्बूको स्मृतिमा आयोजना गरिएको हो। विद्यालयको नेतृत्व गरिरहेकै बेला कोरोना महामारीका क्रममा २०७८ साल साउन १५ गते उनको निधन भएको थियो।